Coincidindo cos Premios Min e que optamos ao premio de «Mellor deseño gráfico», plantexámonos facer algunhas entradas sobre o deseño do noso primeiro CD e a orixe dos elementos que atopades nel.
A maior inspiración proven do amigo e deseñador Paco Boluda, que realizou elementos centrais do CD como a portada e o Cronobecho. Recomendámosvos encarecidamente que visitedes o seu traballo en Facebook
A PORTADA
A idea forza dos traballos de Paco Boluda é que a estética kallaika é tan potente e propia que se pode presentar, actualizar, acoplar e misturar con calquer outro estilo de arte que nos imaxinemos (renacentista, Art nouveau, maquinismo, steampunk…). Nese sentido debería ser recuperada e reivindicada como produto estético, cultural e mesmo recurso de deseño .
Na portada do Digipack destaca o Kallaiko de Vitrubio, obra de Paco , na que misturando dúas nocións de arte, combinou unha figura moi coñecida como o home de Vitrubio de Leonardo da Vinci e a súa proporción áurea, c.1492, coas estatuas dos guerreiros galaicos, s. V a III A.C. (aos que tamén se lles aplicou a proporción áurea). Ambas son moi representativas de dúas épocas, unha da Idade de Ferro e outra do Renacemento, mais dous conceptos aparentemente moi diferentes que no fondo únense na esencia.
Para a texturación do fondo da capa, tipo pergameo, empregamos a tapa de coiro de año dun tomo antigo do s. XVII, que temos no Arquivo Castro Vicente.
Portada, contraportada e lomo do Digipack enmarcámolas con motivos xeométricos procedentes dunha lousa de pedra de orixe castrexo que apareceu dada a volta facendo o altar da capela de Formigueiros, Trasalba-Amoeiro, (Ourense).
A tipografía de TOR, marca identificativa do grupo, e do texto “Folk Céltico da Galiza”, extraímola da espectacular lápida fundacional do mosteiro de San Pedro de Rocas (Esgos-Ourense) datada no 573 D.C. (en pleno reinado suevo), que temos no Museo Arqueolóxico de Ourense. Ten ademáis moitas características comúns con tipografías medievais que se teñen espallado no S. XX no imaxinario como arte céltico.
E na contracapa adiantamos xa uns elementos do deseño do Cronobecho que vai no interior.
